രംഗത്ത്-കാലകേയന്(ഒന്നാംതരം ചുവപ്പുതാടിവേഷം*), രാക്ഷസന്(ഭീരുവേഷം)
.
ശ്ലോകം-രാഗം:ആഹരി(മുന്പ് നാഥനാമാഗ്രിയിലാണ് ആലപിച്ചിരുന്നത്)
“ഹത്വാ നിവാതകവചം സമരേ സസൈന്യം
പ്രസ്ഥാതുമിച്ഛതി ദിവം ത്രിദശേന്ദ്രസൂനൌ
ദൈത്യാസ്തു കേചന സമേത്യ ഹതാവശിഷ്ടാ:
നത്വാ തമൂചരഥ സംസദി കാലകേയം”
{സമരത്തില് നിവാതകവചനെ നിഗ്രഹിച്ചശേഷം ഇന്ദ്രസൂനു സൈന്യസമേതം സ്വര്ഗ്ഗത്തിലേക്ക് മടങ്ങുവാന് ഉദ്ദേശിച്ചപ്പോള്, മരിക്കാതെശേഷിച്ച ചില ദൈത്യര് ഉടനെ കാലകേയന്റെ സദസ്സിലെത്തി ഇങ്ങിനെ പറഞ്ഞു}
.
കാലകേയന്റെ തിരനോട്ടം, തുടര്ന്ന് ഭീരുവിന്റെ തിരനോട്ടം.
വീണ്ടും തിരതാഴ്ത്തി കാലകേയന് രംഗമദ്ധ്യത്തിലെ പീഠത്തിലിരുന്ന് ഉത്തരീയം വീശുന്നു.
തുടര്ന്ന് തന്റേടാട്ടം-
കാലകേയന്:(എഴുന്നെറ്റ് സദസ്സിനെ അഭിവാദ്യംചെയ്ത്, പീഠം തൊട്ടുവന്ദിച്ചിട്ട്, ‘അഡ്ഡിഡ്ഡിക്കിട’ ചവുട്ടിയിട്ട്) ‘എനിക്ക് ഏറ്റവും സുഖം ഭവിച്ചു. കാരണമെന്ത്?’ (ആലോചിച്ചിട്ട്) ‘ഓ,മനസ്സിലായി. എന്നെ പോലെ ബലപരാക്രമമുള്ളവരായി ഇന്ന് ത്രൈലോക്യത്തിങ്കല് ആരുണ്ട്? ഹേയ്, ആരുമില്ല. അതുകൊണ്ട് എനിക്ക് ഏറ്റവും സുഖം ഭവിച്ചു.’
കാലകേയന് വീണ്ടും പീഠത്തിലിരുന്ന് താടി ഒതുക്കുകയും മീശപിരിക്കുകയും ചെയ്തിട്ട്, ഉത്തരീയം വീശുന്നു.
കാലകേയന്:(നേരെമുന്നില് ഒരാള് വരുന്നതുകണ്ട് പെട്ടന്നെഴുന്നേറ്റ് സൂക്ഷിച്ചുനോക്കിയിട്ട്) ‘മാറില് അസ്ത്രം തറച്ച്, നിലവിളിച്ചുകൊണ്ട് നേരെ വരുന്നതാര്? ഒരു അസുരഭടനോ? അതെ, അതെ. കഷ്ടം! ഇവനെ ഇങ്ങിനെ ചെയ്തത് ആരെന്ന് അറിയുകതന്നെ.’
ഭീരു മുന്നിലൂടെ(സദസ്സ്യരുടെ മദ്ധ്യത്തിലൂടെ) രംഗത്തേക്ക് വരുന്നു. കാലകേയന് മുന്നോട്ടുവന്ന് ഭീരുവിനെ മാടിവിളിക്കുന്നു. ഭീരു രംഗത്തെത്തി കാലകേയന്റെ കാല്ക്കല് വീഴുന്നു. കാലകേയന് അനുഗ്രഹിച്ചിട്ട്, ഭീരുവിന്റെ മാറില്നിന്നും അമ്പ് പറിച്ചെടുത്തശേഷം പിടിച്ചെഴുനേല്പ്പിക്കുന്നു.
കാലകേയന്:‘നിന്നെ ഇങ്ങിനെ ചെയ്തതാര്?
ഭീരു:‘പറയാം, കേട്ടാലും’
വികൃതമായരീതിയില് നാലാമിരട്ടിയെടുത്തുകലാശിച്ചിട്ട് ഭീരു പദാഭിനയം ചെയ്യുന്നു
.
ഭീരുവിന്റെ പദം-രാഗം:ആഹരി,താളം:ചമ്പ(മൂന്നാം കാലം)
പല്ലവി:
“ദൈത്യേന്ദ്രമകുടമണിദേദീപ്യമാന ജയ
കൃത്യജ്ഞ മൊഴി കേള്ക്ക മേ”
ചരണം1:
“പാര്ത്ഥനെന്നൊരു മനുജമൂര്ത്തിയെ കൈക്കൊണ്ടു
മൃത്യുതാന് തന്നെയധുനാ
ചേര്ത്തിതു നിവാതകവചാദികളെയൊക്കവെ
മാര്ത്താണ്ഡസുതമന്ദിരേ“
{ദൈത്യേന്ദ്രന്മാരുടെ ശിരോരത്നമായി അത്യന്തം ശോഭിക്കുന്നവനേ, വിജയിച്ചാലും. കൃത്യജ്ഞനായ അങ്ങ് എന്റെ മൊഴി കേട്ടാലും. പാര്ത്ഥന് എന്നൊരു മനുജവേഷം കൈക്കൊണ്ടുവന്ന മൃത്യു, നിവാതകവചാദികളെയൊക്കെ യമപുരിയിലയച്ചു.}
.
കാലകേയന്:‘ഛീ, ഛീ, അപമാനം’
.
കാലകേയന്റെ മറുപടിപദം-രാഗം:കേതാരഗൌഡം, താളം:ചമ്പ(നാലാം കാലം)പല്ലവി:
“അത്യത്ഭുതംതന്നെ മര്ത്ത്യനതിദുര്ബ്ബലന്
ദൈത്യരെ ഹനിച്ചതോര്ത്താല്”
ചരണം1:
“അദ്യൈവ ഞാന് ചെന്നു മായാബലേന തം
സദ്യോ ഹനിച്ചീടുന്നേന്
ദൈന്യം വെടിഞ്ഞു വൈകാതെ പുറപ്പെടുക
സൈന്യങ്ങളൊക്കെയധുനാ”
{അതിദുര്ബ്ബലനായ മര്ത്ത്യന് ദൈത്യരെ ഹനിച്ചത് ഓര്ത്താല് അത്യത്ഭുതം തന്നെ. ഇപ്പോള്തന്നെ ഞാന് ചെന്ന് മായാബലം കൊണ്ട് വേഗം അവനെ ഹനിക്കുന്നുണ്ട്. സൈന്യക്കളോക്കെ ഇപ്പോള് ദൈന്യതവെടിഞ്ഞ് വേഗം പുറപ്പെടുക}
കാലകേയന്:(ഭീരുവിനെ വലതുഭാഗത്തേക്ക് മാറ്റിനിര്ത്തിയിട്ട്) ‘ഇനി വേഗം യുദ്ധത്തിന് പുറപ്പെടുക തന്നെ’
തുടര്ന്ന് പടപ്പുറപ്പാട്-
കാലകേയന്:(‘അഡ്ഡിഡ്ഡിക്കിട’ ചവുട്ടി, ഇടതുഭാഗത്ത് സൂതനെകണ്ട്,അനുഗ്രഹിച്ചിട്ട്) ‘എടോ സൂതാ,വേഗം തേര് ഒരുക്കി കൊണ്ടുവന്നാലും.’ (‘അഡ്ഡിഡ്ഡിക്കിട’ ചവുട്ടി വലത്തേക്കു തിരിഞ്ഞ് ദൂതന്മാരെ കണ്ട്, അനുഗ്രഹിച്ചിട്ട്) ‘അല്ലയോ ദൂതന്മാരേ, നമ്മുടെ ആയുധങ്ങളെല്ലാം വേഗത്തില് കൊണ്ടുവരിക.’ (‘അഡ്ഡിഡ്ഡിക്കിട’ ചവുട്ടി ഇടത്തേക്കു തിരിഞ്ഞ് സൂതനെ കണ്ട്) ‘കൊണ്ടുവന്നുവോ?’ (കൊണ്ടുവന്ന രഥം പരിശോധിച്ചിട്ട്) ‘തേരു തെളിക്കുവാന് വരട്ടെ’ (‘അഡ്ഡിഡ്ഡിക്കിട’ ചവുട്ടി വലത്തേക്കു തിരിഞ്ഞ് ദൂതന്മാരേ കണ്ട്) ‘കൊണ്ടുവന്നുവോ?’ കാലകേയന് ദൂതന്മാരുടെ കയ്യില് നിന്നും വില്ല് വാങ്ങി ഞാണ് മുറുക്കി വലിക്കുന്നു. ശേഷം അമ്പ്, വാളും പരിചയും, ശൂലം, കുന്തം മുതലായ ആയുധങ്ങള് ദൂതനില് നിന്നും വാങ്ങി, ഓരോന്നും പയറ്റി രഥത്തില് വെച്ചുകെട്ടുന്നു. തുടര്ന്ന് തന്റെ ഉടവാളുകള് എടുത്ത് തുടച്ചുമിനുക്കി അരയില് ഉറപ്പിച്ച് പടച്ചട്ടയണിയുന്നു.കാലകേയന്:(ഭടന്മാരോട്) ‘എല്ലാം തയാറായി, ഇനി യുദ്ധത്തിനു പുറപ്പെടുവിന്’ ( ഇതിനിടക്ക് പീഠത്തില് കയറി സ്വസ്ഥനായി ഇരിക്കുന്ന ഭീരുവിനെ ചവുട്ടി മറിച്ചിട്ടിട്ട്, പീഠത്തില് കയറി ഇളകി പുറപ്പെടുന്ന സൈന്യങ്ങളെ കണ്ട്) ‘നടപ്പിന്, നടപ്പിന്’ (താഴെയിറങ്ങിയിട്ട് ആത്മഗതം) ‘ഇനി വേഗം പോയി ആ മനുഷ്യനെ ജയിക്കുകതന്നെ’ (സൂതനോട്) ‘ഇനി ആ മനുഷ്യന്റെ സമീപത്തേക്ക് തേര് വഴിപോലെ തെളിച്ചാലും’
അനന്തരം നാലാമിരട്ടിയെടുത്ത് കലാശിക്കുന്നതോടെ അമ്പും വില്ലും വാളും ധരിച്ചുകൊണ്ട് കാലകേയന് ഭീരുവോടുംകൂടി തേരിലേക്ക് ചാടിക്കയറിയിട്ട്, പിന്നോക്കം കാല്കുത്തിമാറി നിഷ്ക്രമിക്കുന്നു
.
-----(തിരശ്ശീല)-----
.തെക്കന് ചിട്ടപ്രകാരം പത്താം രംഗത്തിലുള്ള പ്രധാന വെത്യാസം
*കാലകേയന് വേഷം ചുവന്നതാടി അല്ല, നെടുംകത്തിയാണ്.
.jpg)
0 പിന്മൊഴികള്:
Post a Comment